Transcript
السلام عليكم ورحمة الله وبركاته أبطال ثالثة إعدادي يلا بينا مع الجزء الثاني من أول درس عندنا في الوحدة الثانية تولية محمد علي حكم مصر وتثبيت دعائم حكمه عرفنا مع بعض في الجزء الأول إزاي محمد علي وصل لحكم مصر سنة 1805 1805 أيوه التاريخ ده إوعى تنساه محمد علي مسك حكم مصر سنة 1805 النهاردة بقى هنشوف مع بعض إيه هي المشاكل اللي هتقابل محمد علي في بداية حكمه مشاكل أيوه محمد علي هيقابل أربع مشاكل بنقول على المشاكل دي تحديات تحديات هتواجه محمد علي بعد توليه حكم مصر قالك بقى أنا عايزك تعرفلي كل مشكلة من المشاكل دي وإزاي قدر محمد علي يحلها وأول حاجة عندي وأول مشكلة هتقابل محمد علي على طول بعد ما مسك الحكم بسنة واحدة هو مسك سنة كام 1805 في سنة 1806 محمد علي كان هيتنقل من مصر يعني محاولة نقل محمد علي إلى ولاية إسمها سالونيك سنة كام 1806 محمد علي ما كملش سنة وكان هيمشي طب إزاي الكلام ده وإيه اللي حصل أقولك السلطان العثماني أصدر فرمان يعني قرار سنة 1806 القرار ده في حاجتين أول حاجة نقل محمد علي إلى ولاية سالونيك يعني محمد علي هيسيب مصر ويروح يمسك ولاية إسمها سالونيك سالونيك دي مدينة في اليونان يعني في أوروبا طبعاً مش زي مصر طب مين اللي هيحكم مصر قالك اللي كان ماسك سالونيك هنجيبه مكان محمد علي طب هو مين اللي كان ماسك سالونيك في الوقت ده قالك واحد إسمه موسى باشا هنعينه مكان محمد علي في مصر يعني وتعيين موسى باشا والي سالونيك والياً على مصر بدلاً من محمد علي طب ليه؟ ليه السلطان العثماني يطلع القرار ده ويحاول ينقل محمد علي؟ أقولك وأنت مالك؟ ما تسكت.
هو الراجل ما رضاش يقولنا فنسكت بقى. بس أنا هقولك. إنجلترا ما بتحبش محمد علي. ومحمد علي برضه ما بيحبش إنجلترا. وكمان ما بيحبش المماليك. محمد علي لا بيحب إنجلترا ولا بيحب المماليك. إنجلترا مش عايزة محمد علي يفضل في حكم مصر. وطبعا أنت فاهم إن إنجلترا ليها مصالح والطريق التجارة بتاعتها اللي جاية من الهند. فكانت عايزة تشيل محمد علي. فراحت قالت للسلطان العثماني: أنا عايزك تشيل محمد علي من حكم مصر. وهو سمع كلامهم وطلع فرمان بنقل محمد علي. بس اللي أنا قلتهولك ده كأني ما قلتوش. ليه؟ لأنه مش عندك في المنهج. بس عشان تبقى فاهم إيه اللي حصل. المهم. السلطان العثماني أصدر فرمان. يعني قرار. قرارات السلطان العثماني بقول عليها فرمان.
سنة 1806. يعني بعد ما محمد علي مسك بسنة واحدة. القرار ده فيه إيه؟ أو الفرمان ده؟ قالك يتضمن. كلمة يتضمن يعني فيه إيه؟ قالك واحد. نقل محمد علي إلى ولاية سالونيك. إثنين. تعيين موسى باشا والي سالونيك واليا على مصر بدلا من محمد علي. طب. هو محمد علي هيعمل إيه بقى في المشكلة دي؟ هل هينفذ قرار وفرمان السلطان العثماني وهيمشي خلاص من مصر؟ أقولك لا طبعا. مش محمد علي اللي يستسلم بالسهولة دي. لم يستسلم لقرار السلطان العثماني أو فرمان 1806. طب يعني هيعمل إيه؟ قالك راح للناس اللي كانوا السبب في إنه يمسك حكم مصر. اللي هم المشايخ والعلماء. وطلب منهم المساعدة. قالهم: والنبي. والنبي. اكتبوا رسالة للسلطان العثماني وقولوا له يلغي الفرمان ده ويسيبني في حكم مصر.
وفعلا ده اللي حصل. المشايخ والعلماء بعتوا رسالة للسلطان العثماني وقالوا له إحنا عايزين محمد علي. ما تغيرش محمد علي. هنا السلطان العثماني إتراجع عن القرار وأصدر مرسوم بتثبيت محمد علي واليا على مصر. مرسوم برده يعني قرار. يبقى أنا ممكن أقول على قرارات السلطان العثماني أقول فرمان وممكن في أحيانا أقول مرسوم. المهم السلطان العثماني رجع عن اللي كان هيعمله. بسبب مين؟ بسبب المشايخ والعلماء. لولاهم كان محمد علي اتنقل لولاية سالونيك وخلاص ما عادش هيحكم مصر. فلما يجيلك سؤال يقولك دلل اثبتلي لم يستسلم محمد علي لقرار السلطان العثماني بنقله عام 1806. قولي عمل إيه بيدل إن هو ما استسلمش؟ أقوله طلب المساعدة من مين ومن مين؟ من المشايخ والعلماء.
بكتابة إيه؟ رسالة للسلطان العثماني. هيطلبوا منه إيه في الرسالة دي؟ حاجتين. إنه يلغي الفرمان ويسيب مين؟ محمد علي. يعني بإلغاء هذا الفرمان والإبقاء على محمد علي وليا على مصر. فإيه اللي حصل؟ فتراجع السلطان العثماني عن قراره وأصدر مرسوم بتثبيت محمد علي وليا على مصر. يبقى احنا كده عرفنا إزاي محمد علي لم يستسلم؟ اه. لما راح طلب المساعدة من المشايخ والعلماء وقالهم اكتبولي رسالة بسرعة للسلطان العثماني انتوا اللي هتطلبوا منه وهو هيسمع كلامكم لأنكم انتوا اللي بتمثلوا الشعب. فلما تقولوله احنا عايزين فلان فهو هيسمع الكلام. وده اللي حصل. طلبوا بإلغاء هذا الفرمان والإبقاء على محمد علي وليا على مصر. فتراجع مين عن قراره؟ السلطان العثماني.
وقام أصدر مرسوم تاني علشان يثبت محمد علي بقى وليا على مصر. لأنه كان طلع فرمان فلازم يطلع قرار تاني ويثبت مين؟ محمد علي. طب لما يجيلي سؤال يقولي ما النتائج المترتبة على وقوف الزعامة الشعبية بجانب محمد علي سنة 1806؟ استنى هنا. إيه الزعامة الشعبية؟ أقولك بص. المشايخ والعلماء بنقول عليهم الزعامة الشعبية. يبقى لما نيجي نتكلم عن الناس اللي بتتكلم باسم الشعب المصري بقول عليهم الزعامة الشعبية. اللي هما مين؟ المشايخ والعلماء. طيب هو بيقولي إيه اللي حصل سنة 1806؟ اه. يبقى أنا لازم أحفظ السنين. محمد علي مسك الحكم 1805. كان هيتنقل في ثاني سنة 1806. طب اللي حصل بقى لما الزعامة الشعبية وقفت جنبه؟ أقول له: تراجع السلطان العثماني عن قراره بنقل محمد علي إلى ولاية إيه؟ سالونيك.
وقام أصدر مرسوم بتثبيت محمد علي واليًا على مصر. ثاني: ما النتائج المترتبة على وقوف الزعامة الشعبية بجانب محمد علي سنة 1806؟ إيه اللي حصل لما المشايخ والعلماء وقفوا جنب محمد علي وبعتوا رسالة للسلطان العثماني؟ أقول له: تراجع السلطان العثماني عن قراره بنقل محمد علي إلى ولاية سالونيك. وأصدر مرسوم بتثبيت محمد علي واليًا على مصر. طيب، كده محمد علي حل أول مشكلة. بمساعدة مين؟ بمساعدة المشايخ والعلماء. اللي هم الزعامة الشعبية. حلو جدًا. كده فلت من أول مشكلة. طب ثاني مشكلة بقى هتقابل محمد علي؟ قال لك: في السنة اللي بعدها على طول سنة 1807. إيه اللي حصل؟ قال لك: فيه جيش كبير جاء علشان يحتل مصر. جيش؟ أيوه.
الجيش ده اسمه حملة فريزر. حملة فريزر؟ أيوه. حملة فريزر ديت الحملة والجيش ده اللي بعته؟ أقول له: إنجلترا. إنجلترا أرسلت حملة عسكرية بقيادة واحد اسمه فريزر. الحملة دي بنقول عليها حملة فريزر علشان الراجل اللي كان ماسكها اسمه فريزر. طب الكلام ده سنة كام؟ أقول له: سنة 1807. إحنا كده ماشيين بالترتيب. محمد علي مسك 1805. كان هيتنقل 1806. لولا طبعًا الزعامة الشعبية ما رجعت الحوار. بعد كده في سنة 1807 فيه جيش إنجليزي يعني حملة فريزر جاية علشان تحتل مصر. طب السؤال هنا: بما تفسر أرسلت إنجلترا حملة بقيادة فريزر إلى مصر سنة 1807؟ أقول له: علشان عايزين يحتلوا مصر. يعني لاحتلال مصر. ومش عايزين محمد علي يمسك حكم مصر.
عايزين واحد تبعهم اسمه محمد بك الألفي. محمد بك الألفي؟ آه. محمد بك الألفي ده كان أحد زعماء المماليك اللي كان تابع الإنجليز, يعني المواليين للإنجليز. الحملة دي كانت جاية علشان تمسكه حكم مصر. إيه تاني سبب يخلي إنجلترا تبعت حملة فريزر؟ أقول له مساعدة محمد بيك الألفي لإقامة حكم موالي للإنجليز في مصر, تابع الإنجليز. هي مش هتعين حد من عندها اه, بس هتجيب حد تبعها. يبقى تاني, بما تفسر أرسلت إنجلترا حملة بقيادة فريزر إلى مصر عام 1807؟ أقول له لاحتلال مصر, عايزة تحتل مصر. تاني حاجة, مساعدة محمد بيك الألفي اللي هو من المماليك لإقامة حكم موالي للإنجليز في مصر. طب بس برضه أنا عايز أعرف إيه اللي يخلي إنجلترا تعمل كده أصلاً في البداية وعايزة تحتل مصر؟ أقول لك برضه وأنت مالك؟ ما تسكت.
هو الراجل ما قال لناش, بس أنا هقول لك ليه بقى؟ قال لك إنجلترا كانت طلبت من السلطان العثماني يشيل محمد علي, صح؟ اه. والسلطان بعد ما طلع القرار رجع فيه, حصل. لأن الزعامة الشعبية والمشايخ والعلماء وقفوا جنب محمد علي. لما ده حصل, إنجلترا زعلت. فقالت لك أنا بقى هبعت حملة فريزر علشان أشيل الراجل اللي أنا ما بحبوش ده, اللي هو محمد علي, وأعين واحد تبعي اسمه محمد بيك الألفي. الكلام ده مش عندنا, بس أنا بقول لك عشان تبقى فاهم الأحداث ماشية إزاي. بيقول لك بقى شوف اللي حصل. الحملة وهي جاية في طريقها, عارف أنت محمد بيك الألفي اللي هم جايين عشان يعينوه؟ اه, كان مات في الوقت ده. مات قبل وصول الحملة؟ أيوه. طب الحملة لما توصل مصر؟ هتوصل لمدينة إيه؟ قال لك وصلت لمدينة الإسكندرية واستولت عليها.
هنا فريزر بعد ما استولى على مدينة الإسكندرية, قال لك أنا لازم بقى أبدأ علشان أحتل مصر. فقام باعت فرقتين عسكريتين لأقرب مدينتين لمدينة الإسكندرية, اللي هي مدينة رشيد ومدينة الحماد. اسمها إيه؟ الحماد, مش الحمام. يبقى الحملة الإنجليزية بقيادة فريزر, اللي هي حملة فريزر, استولت على مدينة الإسكندرية. فريزر بعد ما استولى على مدينة الإسكندرية هيقسم الجيش بتاعه لفرقتين, هيروحوا لأقرب مدينتين له, مدينة رشيد ومدينة الحماد، ولكن هيحصل مفاجأة، حملة فريزر قدرت تستولى على مدينة الإسكندرية اه، بس هتفشل في الاستيلاء والسيطرة على مدينة رشيد ومدينة الحماد، وهيتغلبوا هناك. نعم، هيتغلبوا؟ أيوه، بسبب شجاعة وبسالة الأهالي، يعني شجاعة وقوة أهالي رشيد والحماد، وكمان جيش محمد علي كان وصل للحماد وانضم للأهالي ضد حملة فريزر، وده كان السبب خلى الحملة بتاعت فريزر تفشل، لما اتهزمت فين؟ في رشيد والحماد، فهنا فريزر هيرجع لورا تاني للإسكندرية، يعني انسحب إلى الإسكندرية، بعد كده ما عادش يلاقي حاجة يعملها، فكده هينسحب من مصر كلها في نفس السنة، يعني في نفس سنة 1807، يعني فشلت الحملة في تحقيق أهدافها، فشلت إنها تحتل مصر، فشلت إنها تشيل محمد علي وتجيب مكانه محمد بيك الألفي.
تاني. مين اللي كان هيمسك حكم مصر بعد محمد علي؟ محمد بيك الألفي، طب مين اللي عايز كده أصلاً؟ إنجلترا، طب نجحت في الكلام ده؟ أقوله لأ، ليه؟ لأن حملة فريزر اتغلبت فين وفين؟ في مدينة رشيد ومدينة الحماد، وهنا هنطلع سؤالين، سؤال بما تفسر، وسؤال ما النتائج، سؤال بما تفسر فشل حملة فريزر عام 1807 في تحقيق أهدافها، ليه الحملة دي فشلت وخرجت من مصر؟ إنجلترا تتغلب؟ اه، ليه؟ أقوله بسبب بسالة أهالي رشيد والحماد. بسبب ايه؟ بسبب بسالة أهالي رشيد والحماد، كلمة بسالة يعني شجاعة في المقاومة، فبقول عليها بسالة مش بسلة، لأ، بسالة أهالي رشيد والحماد، وانضمام جيش محمد علي لأهالي الحماد، أقف هنا بقى واحفظلي الإجابة دي، تاني، ليه حملة فريزر فشلت في تحقيق أهدافها؟ ليه حملة فريزر اتغلبت؟ أقوله له بسالة أهالي رشيد والحماد.
ثاني، بسبب بسالة أهالي رشيد والحماد، وانضمام جيش محمد علي لأهالي الحماد. السؤال ده يتكتب. طب، سؤال: ما النتائج؟ ما النتائج المترتبة على حملة فريزر على مصر عام 1807؟ أقول له: انسحب وانسحبت. يعني إيه؟ انسحب فريزر من رشيد والحماد إلى الإسكندرية. وبعد كده انسحبت الحملة كلها من مصر في نفس العام. الكلام ده بعد ما حققت أهدافها؟ أقول له: لأ طبعًا، بعد فشلها في تحقيق أهدافها. ثاني، ما النتائج المترتبة على حملة فريزر؟ أقول له: انسحب وانسحبت. انسحب فريزر من رشيد والحماد إلى الإسكندرية. بعد كده انسحبت الحملة كلها من مصر في نفس السنة، يعني في نفس العام، بعد فشلها في تحقيق أهدافها، بعد ما فشلت إنها تعمل اللي مطلوب منها.
كان مطلوب منها كم حاجة؟ حاجتين، إنها تحتل مصر، وتعين مين في حكم مصر؟ محمد بك الألفي. بدل من مين؟ بدل من محمد علي. كده محمد علي عدى برضه من ثاني مشكلة كانت بتهدد حكمه، وهي حملة فريزر اللي بعتتها مين؟ إنجلترا. ثالث مشكلة قابلت محمد علي، الزعامة الشعبية. الزعامة الشعبية؟ استنى هنا. الزعامة الشعبية دي مش أنت قلت لي اللي هم المشايخ والعلماء؟ أيوه. طب إزاي والناس دول كانوا السبب في تولية محمد علي حكم مصر سنة 1805؟ وبرضه كان السبب في فشل محاولة نقل محمد علي لولاية سالونيك سنة 1806. الناس دول واقفين جنب محمد علي. طب إيه اللي حصل؟ وليه يبقى فيه مشاكل وتحدي بين محمد علي والزعامة الشعبية؟ وليه بعد كده محمد علي هيتخلص من الناس أصحاب الفضل عليه؟ أقول لك علشان محمد علي كان عايز ينفرد بحكم مصر.
عايز إيه؟ ينفرد بحكم مصر؟ طب ما هو ماسك مصر. طب ما هو الوالي بتاع مصر. أقول لك: لأ استنى. فاكر لما الزعامة الشعبية اللي هم المشايخ والعلماء راحوا قعدوا في بيت القاضي؟ كانوا قرروا حاجتين: عزل خورشيد باشا وتولية محمد علي. بس خلي بالك كانوا حاطين عليه شروط. قالوا له: أنت هتحكم آه، بس ما تعملش حاجة إلا لما ترجع لنا في كل كبيرة وصغيرة. يعني كانوا حاطين عليه شروط، حاجات، قيود. فمحمد علي مش بيحكم كده بمزاجه. كان لازم يرجع لمين؟ للزعامة الشعبية. اللي هم مين؟ المشايخ والعلماء. فمحمد علي مش عايز كده. كان عايز ينفرد بحكم مصر لأنه كان عايز يعمل حاجات كثيرة ومش كل كبيرة وصغيرة هرجع بقى للمشايخ والعلماء. طب هو إيه اللي حصل بالضبط؟ وليه يحصل خلاف أصلاً بين محمد علي والزعامة الشعبية في البداية كده؟ قال لك لأن محمد علي فرض ضرائب جديدة وصادر بعض الممتلكات.
نعم. حتى محمد علي فرض ضرائب على المصريين. أيوة. فاكر كل الولاة اللي جم قبل محمد علي فرضوا ضرائب. وده كان السبب في إنهم يتشالوا من حكم مصر. محمد علي هيعمل نفس المشكلة؟ أه. فرض ضرائب جديدة وصادر بعض الممتلكات. طب ليه؟ ليه يا محمد يا علي تعمل كده؟ قال لك يا باشا أنا عايز أوفر رواتب الجنود. ومفيش فلوس. يعني عندي أزمة مالية كبيرة لتوفير رواتب الجنود. ليه برضه؟ قال لك لأن مصر ما كانتش حلوة بسبب تدهور الأوضاع الاقتصادية في البلاد. لا زراعة ولا صناعة ولا تجارة ولا أي حاجة حلوة في مصر. فمفيش فلوس أدفع رواتب الجنود. فهنا محمد علي فرض ضرائب جديدة وصادر بعض الممتلكات. وإحنا عارفين أول ما تفرض ضرائب على المصريين هيعملوا ثورة ويتجمهروا، يتجمعوا.
وده اللي حصل. تجمهر الأهالي في الجامع الأزهر. الأهالي اتجمهروا فين؟ في الجامع الأزهر. بسبب إن محمد علي فرض ضرائب جديدة وصادر بعض الممتلكات. هنا بقى المشايخ والعلماء راحوا لهم وتضامنوا معاهم. طبعاً بزعامة مين؟ فاكر لما قلت لك أهم شخصية عندي واحد اسمه عمر مكرم. اللي هو مين؟ نقيب الأشراف. يبقى لما الأهالي تجمهروا وقعدوا في الجامع الأزهر اعتراضاً واحتجاجاً على محمد علي لما فرض ضرائب جديدة اللي حصل إن المشايخ والعلماء اللي هم الزعامة الشعبية بزعامة عمر مكرم نقيب الأشراف تضامنوا معاهم احتجاجاً على هذه الإجراءات واتفقوا كمان إنهم لازم يدافعوا عن حقوق الشعب اللي هم المشايخ والعلماء لازم ندافع عن حقوق الشعب المصري.
بيقولك بقى محمد علي لما عرف اجتماع الزعامة الشعبية مع الأهالي الذين تجمهروا في الجامع الأزهر بعث لهم علشان يقابلهم ويتفاوض معاهم ولكن هنا بقى الزعامة الشعبية اللي هم المشايخ والعلماء رفضوا رفضوا أه رفضوا إنه يقابلوا محمد علي. طب ليه؟ قالوا له ما احنا مش هنقابلك لحد ما تلغي الضرايب. يبقى تاني لما محمد علي بعث للزعامة الشعبية يعني المشايخ والعلماء رفضوا إنه يقابلوه حتى يلغي الضرايب. هنا بقى محمد علي قالك لا كده الزعامة الشعبية بتقل مني كده بتمثل خطورة على مكانتي أنا والي مصر بقولهم تعالوا قابلوني يرفضوا وكمان أنا عايز أتخلص منهم علشان أنفرد بحكم مصر أنا عايز آخذ قرارات مش كل قرار هرجع فيه للزعامة الشعبية فأنا كده عندي سببين يخلوا محمد علي يبدأ يفكر في التخلص من الزعامة الشعبية.
ليه؟ لأنه أدرك مدى خطورة الزعامة الشعبية على مكانته ورغبته في التخلص منهم للإنفراد بحكم مصر. طب هو محمد علي هيعمل إيه برضه علشان يتخلص من الزعامة الشعبية؟ قالك أنا مش هحارب كل الناس أنا هشوف أقوى واحد في الزعامة الشعبية وهشيله وهبعده عن الأحداث في القاهرة. مين بقى أقوى شخصية في الزعامة الشعبية؟ طبعًا عمر مكرم اللي هو نقيب الأشراف. أنا لو تخلصت من عمر مكرم كده يبقى أنا تخلصت من الزعامة الشعبية بس مش هقتله لا. عمر مكرم راجل محبوب أنا هشيله من منصبه الناس بتقدر الراجل ده علشان هو نقيب الأشراف وهجيب مكانه واحد تاني تبعي اسمه الشيخ السادات يبقى الشيخ السادات ده هيتعين مكان مين؟ مكان عمر مكرم وهياخذ عمر مكرم يوديه دمياط يعني ينفيه يبعده عن القاهرة بدل ما يحبسه في سجن في القاهرة فالناس هتتعاطف ومش عارف إيه لا ده أنا أنفيه أبعده إلى مدينة دمياط مدينة دمياط دي جوه مصر خلي بالك كان بييجي فيها سؤال قبل كده.
الكلام ده حصل سنة 1809. يبقى محمد علي عمل حاجتين علشان يتخلص من الزعامة الشعبية. عزل عمر مكرم من منصبه ونفاه إلى دمياط عام 1809. وعين مكانه واحد تبعه اسمه الشيخ السادات نقيبًا للأشراف. وعلى فكرة دي إجابة سؤال ما النتائج المترتبة على إدراك محمد علي خطورة الزعامة الشعبية على مكانته. لما محمد علي حس إن الزعامة الشعبية هتأثر على مكانته وحكمه لمصر عمل حاجتين. عزل عمر مكرم من منصبه ونفيه إلى دمياط عام 1809. وعين مكانه الشيخ السادات نقيبًا للأشراف. كده قدر محمد علي يتخلص من الناس اللي كانوا السبب في إنه يمسك الحكم. وكمان كانوا السبب في إنه ما يتنقلش من مصر إلى ولاية سالونيك. فده يعتبر طبعًا مش رد جميل، يعتبر خيانة للناس اللي جابوه.
يبقى كده محمد علي تالت مشكلة هيحلها الزعامة الشعبية. الزعامة الشعبية حصل ما بينها وبين محمد علي مشاكل لإن محمد علي فرض ضرايب جديدة. ومصادرة بعض الممتلكات. فالناس لما اتجمعوا في الأزهر الزعامة الشعبية بزعامة عمر مكرم نقيب الأشراف احتجوا طبعًا على الإجراءات اللي عملها محمد علي وقالوا إحنا لازم ندافع عن حقوق الشعب المصري. محمد علي لما طلبهم يقابلوه رفضوا. قالوا له ما إحناش جايين لك لحد ما تلغي الضرايب. هنا أدرك إيه؟ خطورة الزعامة الشعبية على مكانته ورغب في التخلص منهم للإنفراد بحكم مصر. محمد علي علشان يحقق ده ويقضي على الزعامة الشعبية هيتخلص من مين؟ من عمر مكرم. فعزل عمر مكرم من منصبه. ونفاه إلى دمياط سنة 1809.
وعين مكانه شيخ اسمه الشيخ السادات نقيبًا للأشراف. بكده محمد علي عدى برضه من تالت مشكلة اللي هم الزعامة الشعبية. طب رابع وآخر مشكلة وخطر عندي هيقابل محمد علي وهو خطر المماليك. المماليك أيوة. أكتر ناس محمد علي بيكرههم. وكان شايف إنهم بيهددوا حكمه. الناس دي مش سهلة. الناس ديت كل شوية أصلًا مزهقيني في حكم مصر، عايزين هم اللي يحكموا، علشان كده أنا لازم أتخلص منهم. فمحمد علي عمل حاجتين: سعى للتخلص منهم في عدة معارك، حاربهم كتير جداً، وآخر حاجة عملها دبر لهم مذبحة بنقول عليها مذبحة القلعة عام 1811. تاني كده، محمد علي آخر خطر هيقابله وبعد كده بقى يفضل حكم مصر ويبدأ يعمل حاجات كتيرة جداً في مصر كان هو خطر المماليك.
أكتر ناس محمد علي بيكرههم وكان شايف إنهم بيهددوا حكمه. علشان كده محمد علي عمل حاجتين: سعى للتخلص منهم في عدة معارك، حارب المماليك كتير جداً علشان يخلص عليهم، ولكن خلص عليهم نهائياً إمتى؟ لما عمل مذبحة اسمها مذبحة القلعة عام 1811. طب، أنا عايز أعرف إيه اللي حصل في مذبحة القلعة دي؟ قالك محمد علي كان عامل حفلة كبيرة جداً جداً في القلعة، عزم فيها بقى كبار رجال الدولة وأمراء المماليك. عزم فيها مين؟ كبار رجال الدولة؟ اه، الناس اللي بيحكموا الدولة، ومعاهم أمراء المماليك. في نهاية الاحتفال. طبعاً أنا مش هقولك الحفلة دي كانت معمولة لإيه. المهم، في نهاية الاحتفال بعد الناس المعزومة كلها ما خرجوا كان لسه المماليك آخر ناس هتطلع.
هنا بقى أغلقت أبواب القلعة، وهنا بدأ جنود محمد علي يتخلصوا من أمراء المماليك في مذبحة بنقول عليها مذبحة القلعة. مذبحة القلعة، محمد علي أصلاً كان عاطي أوامر للجنود أول ما باب القلعة يتقفل أي حد جوه القلعة هيتقتل، اللي كانوا مين؟ كانوا المماليك. هنا بقى تخلص محمد علي من أمراء المماليك اللي كانوا كلهم معزومين فين؟ في الحفلة دي. طب، بعد كده في مماليك كانوا في الصعيد ما حضروش الحفلة، فهنا يبعت القوات بتاعته إلى الصعيد حتى أجلاهم بعيداً عن البلاد، يعني طردهم بعيداً عن البلاد. بكده محمد علي ما عادش حاجة اسمها مماليك في مصر لأنه خلص عليهم حرفياً. بكده محمد علي قدر يواجه كل المشاكل والتحديات اللي قابلته، اللي قلنا كام مشكلة؟ أربعة.
أول مشكلة كان هيتنقل إلى ولاية سالونيك، واللي كان هيمسك مكانه واحد اسمه موسى باشا، وطبعًا لولا الزعامة الشعبية ما كتبت رسالة للسلطان العثماني كان الموضوع ده اتنفذ. فمين اللي وقف جنبه؟ الزعامة الشعبية، يعني المشايخ والعلماء. طيب، بعد كده كان حملة فريزر جاية تحتل مصر وتشيل محمد علي وتجيب مكانه محمد بيك الألفي. لولا أهالي رشيد والحماد. طب ثالث مشكلة؟ قالك الزعامة الشعبية نفسها. لما رفضوا يقابلوا محمد علي بعد ما محمد علي فرض ضرايب على الناس جديدة وصادر بعض الممتلكات والناس اتجمعوا في الأزهر، محمد علي حس إن الزعامة الشعبية في الوقت ده أصبحوا بيمثلوا خطر على مكانته، وكان عايز ينفرد بحكم مصر. طب هيتخلص منهم إزاي؟ لما عزل عمر مكرم من نقابة الأشراف ونفاه إلى دمياط.
قلنا دمياط دي فين؟ قلنا في مصر، يعني من الآخر بعده عن القاهرة والأحداث اللي بتحصل. وعين مكانه واحد اسمه الشيخ السادات نقيبًا للأشراف. كده تخلص من ثلاث مشكلة. رابع مشكلة عنده المماليك. حاربهم كتير جدًا، وآخر حاجة قام عامل لهم مذبحة اسمها مذبحة القلعة. قتل أمراء المماليك كلهم في المذبحة دي، والباقيين اللي كانوا في الصعيد بعت القوات والجنود بتوعه مشوهم بعيد عن مصر، طفشوا أصلًا قدامهم. بكده تخلص محمد علي من كل المشاكل اللي قابلته في بداية حكمه علشان محمد علي يحكم مصر لمدة 43 سنة هيغير فيها شكل مصر كليًا. هيعمل كمية حاجات كتيرة جدًا جدًا جدًا. وبكده نكون خلصنا الدرس. بس استنى، أنا عايزك تركزلي وتحفظلي شوية التواريخ دول.
محمد علي مسك حكم مصر سنة 1805، خلي بالك. تاني سنة على طول كان هيتنقل سنة 1806، حلو. ثالث سنة بعدها على طول 1807 إنجلترا بعتت جيش اسمه حملة فريزر. في 1808 مفيش حاجة. 1809 عمر مكرم هيتشال من نقابة الأشراف ويتنفى إلى دمياط. بعدها بسنة اللي هي 1810 مفيش حاجة 1811 محمد علي عمل مذبحة القلعة كانت في شهر ثلاثة يعني شهر مارس أنا عايزك تحفظلي التواريخ دي 1805 بعدها 1806 بعدها 1807 تسيب سنة تنزل على 1809 تسيب سنة تنزل على 1811 كل سنة من دي تحفظهالي الأسئلة بتيجي ساعات فيها تواريخ فعشان تفهم هو يقصد إيه أصلا بكده نكون خلصنا الدرس الأول ما تنساش تحل الواجب على الجزء ده يلا سلام